سكينة الشريف مصر
ــــــــــــــــــــــــــــــــــــــ
تعالوا نتكلم مع بعض بلهجتنا العامية حبة كدا يمكن نوصل لبعض اسرع.
ودة مش عجز مني اني غير قادرة على كتابة نص بالفصحى
بالعكس تماما ولكن جال بخاطري أن أقوم بهذا الفعل فلم استطيح كبح جماحي .
تربية الأبناء
أتفق معكم تماما انها مش سهلة أبدا ومحتاجه منا اولا حب، ثم صبر، ثم مصابرة، ثم حنكة، ثم مراوغة. ثم مكر، ونرجع لرقم واحد وهو الحب.
عشان أنا بحب إبني فبحبه افضل مني في كل شيئ خلقيا وعلميا، وعشان ده يحصل،
لازم أكون قدوة لأولادي،
وعشان اكون قدوة لازم يتوفر
عندي وبالعافية وغصب عني شوية مبادئ وقيم.
اولى هذه المبادئ. الألتزام الديني،عفة اللسان، ثم الصدق،و الامانة، والكرم، والبذل ثم، العطاء دون انتظار الرد بالمثل، ثم احترام الاخرون وعدم الاقلال منهم، وقبلا احترم ابني في الاصل واشعره بقيمته، وبإنسانيته، ولا اتعامل معه على انه ملكية خاصة بي فلي حق التحكم، والامر، والنهي، او حتى الضرب.
الابن هو ليس ملكية خاصة هو ليس مجرد شيئ مادي بحت هو منحة منحها الله تعالى وعطيته، هو امانة سلمها الله لك هو بشر من لحم ودم
له كل الحق ان تبره قبل أن يبرك. من بداية اختيار أجمل الاسماء له. الى نهاية توفير مناخ مناسب صحي ليترعرع ويكبر في هذا المناخ.
انتي كدا عايزانا ملائكة لانخطئ؟
: ومن قال هذا كلنا خطائون
وأنا اولى الخطائين
كما قال رسول الله صل الله عليه وسلم كل بن آدم خطاء
ولكن نمشي على مبدأ إذا بليتم فاستتروا، بمعني انك وقت ماتسول لك نفسك الضعيفه لخطأ ميكنش قدام ابنك، لما تختلف مع امه يكون في غرفة بعيدة عنهم او دخله في غرفته وحاول يكون الاختلاف بادب واحترام عشان الطفل بيخزن ولما يكبر هيقلدك.
لما تزعل من ابنك احترمه حتى في التوبيخ، لا تهدر كرامته، لا تستخدم سلطتك كأب وتقهره وتكسر كبريائه، مش هتلاقي قدامك غير شخص مقهور مكسور ضعيف تعود علي الاهانة
عشان تشوف ابنك بار بيك. لازم اولا تبره ثم تبر والديك امامه
مش عايز صوته يعلى عليك وطي صوتك وانت بتكلم ابوك. عايزه يحترمك احترم ابوك، عايزه يقبل ايدك قبل قدام عينه ايد أبوك
عايزة يصلي خده للمسجد يصلي جنبك، عايزه يقرأ القرآن اعمل لنفسك انت وهوه ورد يومي، وتبادلوا القراءة سويا،
عايزة يغض البصر. مينفعش تقله غض بصرك ويشوفك وانت تراقب النساء
لما يناديك قله نعم وحاضر
عشان يتعلم يقلك نعم وحاضر،
لما تطلب من ابنك يقوم بأي خدمه ليك قله من فضلك.. لو سمحت، وبعد مايقضيها لك اشكره.
لما يروح معاك مشوار، ونازل او طالع سلم وقدامك وحده ست اقف لغاية الست ماتطلع او اسبقها بسرعه وعرفه السبب عشان لو مأخدش باله،
لو هتشتري حاجه من بائع اتعامل بإحترام وبأدب، ولاتبخس بضاعته عشان تحاول تضغط عليه، واشرح لابنك السبب
لو رايح زيارة او معزوم متقعدتش في مكان كاشف حرمة البيت وعرفه السبب. او استاذن صاحب البيت هتقعد فين وهو اللي يقعدك في المكان المناسب، ابنك هيقلدك
كل بطريقة مهذبة ومنمقة،
علم ابنك ان دينك الاسلامي دين النظام والنظافة وهو أصل الإتيكيت، وأن إتيكيت الغرب مأخوذ من تعاليم سيدنا محمد وسنته التي هاجرناها فغابت ملامحها عنا.
حاول تاكل وتقوم اول واحد. اثني على الاكل وطعمه حتى لو كان سئ لا تعيب الاكل من باب المزح لانكم اصحاب او اهل
الطفل زكي جدا متعملش الخطأ وتقله بهزر.. هوه كمان لما يكبر هيهزر زيك
متجرحش امه قدامه أو حتى من وراه علمه معنى الاحترام متخليهوش يركب على رقبة اخته بمبرر انه ولد
طبقه اللي أكل فيه يغسله بايده لبسه يكويه بنفسه، اخته مش عبده عنده هي كمان ليها كرامتها وتحترم انسانيتها
ليه تقوم بمتطلباتها الشخصية وتكلف بمتطلبات اخوها لانه ولد
وزي مافرض عليها تساعد امها في البيت هو كمان ايده بايدها.
وحتي لو انت بتيجي من شغلك مرهق وتعبان خد راحتك، صلي، واتناول غداءك، ونام واصحي من نومك، حاول تساعد زوجتك مساعدة رمزية قدام طفلك عشان يتعلم منك ان الست مش مستعبدة وانها بشر واننا لازم نساعدها ونساندها لانك مهما تعبت في شغلك ليك وقت وبينتهي اما زوجتك عملها لا نهاية له مربوطة في ساقية..
عايز إبنك يكون متفوق في دراسته اوعاك تفرض عليه حلمك سيبه يرسم حلمه بنفسه،
أولا ازرع فيه حب طلب العلم. كغاية وليس وسيلة
ثانيا: وجب عليك انك تعلمه ازاي يحترم معلمه ويقدره حق قدره وان المعلم صاحب الفضل بعد الله عليه ولاتهين بالفظ او الفعل المعلم ولاتهدر كرامته فالمعلم هو الشمعة التي تحترق لأجل ان يعينك في اخراج لك ابن واعي مثقف مدرك
وهنا نثتثني القلة التي تتاجر بنا وبأبنائنا. ولا عذر لهم عندي مع أن المعلم مهدر كرامته في هذا الزمن ولكن ليس مبرر له للاتجار بأب مطحون او ام تربي أيتام.
في النهاية
عايز ابنك متربي ربي نفسك اولا.
أسال الله لي ولكم ولجميع المسلمين حسن تربية اولادنا ورزقهم الله برنا ورزقنا برهم اللهم امين
وصلى الله وسلم وبارك على سيدنا ونبينا وحبيبنا محمد وعلى آله الطيبين الطاهرين وسلم تسليما كثيرا عدد خلقه ورضا نفسة وزنة عرشه ومداد كلماته
سبحانك اللهم وبحمدك أشهد أن لا إله إلا أنْت أستغفرك وأتوب إليْك: