للناس اللي مسمعتش عنه قبل كده ، هو تشخيص باين من إسمه، بمعنى إن بيكون فيه تخزين دهون زائدة جوا خلايا الكبد، وهو واحد من المضاعفات اللي بتيجي نتيجة مقاومة الأنسولين .
على عكس ما ممكن نتخيل إنه بيجي نتيجة زيادة الدهون في الأكل ، لكنه بيجي نتيجة لزيادة النشويات في الأكل ، لأن النشويات بتتحول لدهون، والكبد بيخزنها في صورة دهون ثلاثية .
للأسف المرض ده مش بيكون له أعراض واضحة، لكن ممكن يظهر أعراض في مراحله الأخيرة زي التعب المستمر، ورغبة في النوم، وقلة التركيز.
بس حبيت أتكلم معاكم عنه علشان نعرف إيه هي التغذية السليمة له، قبل ما يتطور لتليف في الكبد لاقدر الله .
مع حالات الكبد الدهني بيكون مهم خفض الوزن بطريقة صحية ، بمعدل من نص كيلو إلى كيلو في الأسبوع.
احنا ممكن نتبع نظام غذائي معتدل النشويات، و نعتمد على الحبوب الكاملة، ونزود من الخضار والفاكهة والبروتين النباتي والأسماك، ونقلل من اللحوم الحمراء .
مهم كمان نعتمد على مصادر صحية للدهون، زي زيت الزيتون، والمكسرات، والطحينة، والسمسم ونقلل النشويات البسيطة ( العيش - الأرز - المكرونة ) بشكل كبير .
مهم جدا كمان تعديل أسلوب الحياة والعادات الخاطئة واستبدالها بعادات صحية زي الحفاظ علي كمية الماء علي مدار اليوم وكمان الحفاظ علي روتين يومي من الرياضة والحركة يوميا .
دمتم بصحة وعافية في أنتظار أستفساراتكم في الكومنتات واية الأمراض اللي حابين نتكلم علي التغذية الخاصة بيها ضمن سلسلة التغذية العلاجية عشان نقدر نساعدك بشكل أساسي ان تخلي أكلك جزء مهم جدا واساسي في برنامج العلاج او الوقاية من الأساس 👍👌
دكتور: شريف ناصر ✍️
أخصائي العلاج الطبيعي
والتغذية العلاجية ✅