بقلم داليا فؤاد
اسئله محيرنا من وقت ماسمعنا ان في فيرس جديد بيهددحياتنا دا خالني اقرا وادور عشان اجيب الموضوع صح بالاجايه عليه
س: هل فيروس جدرى القرود ممكن يسبب وباء عالمى زى كورونا (كوفيد-19)؟
- حتى الآن لأ .. كل المؤشرات بتقول انه معدل انتشاره أقل بكتير من معدل كورونا.
س: هل يعتبر جدرى القرود مرض خطير؟
- الحمد لله لأ .. المرض يعتبر من الأمراض اللى ممكن تخف لوحدها أو حتى بأدوية مضادة للفيروسات موجودة حاليا
- بس ممكن يسبب مضاعفات فى حالات نادرة زى الأشخاص اللى مناعتهم ضعيفة (الأطفال، كبار السن، المصابون بأمراض مزمنة)
س: هوا ده فيروس جديد؟
- لأ .. ده فيروس قديم ظهر سنة 1970 ومتوطن فى وسط وغرب افريقيا
س: هل الفيروس اللى منتشر اليومين دول يعتبر متحور؟
- لأ .. لحد دلوقتى كل الحالات اللى جالها المرض عندها نفس الفيروس القديم المعروف
س: طيب ليه فى قلق على كل وسائل التواصل الاجتماعى والاعلام؟
- لأن تم اكتشاف عدد كبير من الحالات خارج افريقيا.
س: مش ده فى حد ذاته يدعو للقلق؟
- ان شاء الله لأ .. لأن ده حصل قبل كده سنة 2003 وتم احتواء انتشار المرض. وكل سنة بيتم اكتشاف حالات قليلة خارج افريقيا.
س: طب لو الموضوع زاد، فى طريقة حماية من الفيروس ده؟
- الحمد لله تطعيم الجدرى المعروف بيدى حماية تصل الى 85% .. وفى 2019 تم انتاج لقاح مخصوص لفيروس جدرى القرود .. وفى جهود من وزارة الصحة المصرية لتوفير التطعيم فى مصر
س: هل تطعيم "الجديرى" (وليس الجدرى) يحمى من الفيروس
- للاسف لأ .. تطعيم الجديرى (Chicken pox) ليس له علاقة بفيروس جدرى القرود
س: ايه أعراض الاصابة بفيروس جدرى القرود؟
- أعراضه شبه الأنفلونزا (حرارة، وجع بالعضلات، صداع) لكن الفرق الرئيسى هو ظهور الطفح الجلدى المميز بحبوب كثيرة منتشرة فى الجسم (خلال 7 أيام من بداية الأعراض).
س: أقلق لو جالى أعراض انفلونزا؟
- لأ ان شاء الله .. الا لو فى تعامل مباشر مع مريض قادم من أقريقيا أو تمت زيارة بلد وسط أو غرب افريقيا قريبا أو التعامل مع شخص تم تشخيصه بهذا المرض
س: طيب بيتنقل ازاى الفيروس ده؟
- انتقاله أصعب من كورونا .. الفيروس بيتنقل عن طريق لمس الطفح الجلدى للمصاب أو لمس سوائل من جسم المصاب (دم أو صديد أو لعاب) أو العلاقة الحميمة أو استخدام أدواته الشخصية (فوطة أو ملاية أو أدوات الأكل)
- المريض بيكون معدى أثناء فترة المرض (من أسبوعين الى 4 اسابيع)
- وفى طرق أصعب زى التعرض المباشر أو العض من حيوانات مثل القردة أو القوارض المصابة
س: ازاى بيتم تشخيص فيروس جدرى القروض؟
- عن طريق تحليل PCR مخصص لهذا الفيروس .. مهم جدا استشارة الطبيب المختص لو فى شك فى الطفح الجلدى مع باقى الأعراض
ربنا يحافظ علينا اجمعين 💕💕🌹🌹🌹